مركز «أوديتك» كيطلّق حملة «UNMUTE MOROCCO» للتوعية بصعوبات السمع اللي ممكن ما ننتابهوش ليها

أعلن مركز «أوديتك» على إطلاق حملة UNMUTE MOROCCO، وهي مبادرة تحسيسية كتهدف إلى تسليط الضوء على الصعوبات السمعية اللي ممكن يواجهها الإنسان فحياتو اليومية بلا ما ينتبه ليها، مع التشجيع على الاهتمام بصحة السمع ديالنا وديال الناس القريبين لينا.

حملة مستوحاة من الأصوات اللي كنسمعو كل نهار

صوت ما واضحش فالتليفون، موسيقى مشوّهة، أو تشويش خارج من مكبّر الصوت… هاد المواقف اللي كنعيشوها يومياً هي الفكرة اللي اعتمدات عليها حملة UNMUTE MOROCCO باش تقرّب للجمهور الإحساس بالصعوبات اللي كيقدر يواجهها الشخص اللي عندو مشكل فالسمع.

وكتعتمد الحملة على محتويات توعوية بمشاركة صناع المحتوى، بالإضافة إلى وصلات إذاعية كتوظّف نفس الفكرة، بهدف إيصال الرسالة لأكبر عدد ممكن من الناس ومن مختلف الأعمار.

وكتذكّر المبادرة بأن السمع ماشي غير وسيلة باش نسمعو الأصوات، ولكن عنصر أساسي فالتواصل مع الآخرين، سواء فالحوارات اليومية، فالاجتماعات، أو فاللحظات اللي كنجمعو فيها مع العائلة والأصدقاء.

وفهاد السياق، قالت شيماء بلفقيه، المديرة العامة لمركز «أوديتك»، إن فكرة الحملة جات من ملاحظة بسيطة: ملي كيتبدل علينا صوت مألوف، كنلاحظو هاد التغيير بسرعة، ولكن بعض الصعوبات السمعية كتتطور تدريجياً، وكيقدر الإنسان ما ينتبهش ليها.

وأضافات أن الهدف من الحملة هو تشجيع الناس على الاهتمام بسمعهم والانتباه لأي تغييرات ممكن تطرأ على السمع ديال الأقارب ديالهم، وفتح النقاش حول صحة السمع باعتبارها جزء مهم من الصحة العامة وجودة الحياة.

الحوار واستشارة المختصين خطوة مهمة

فبعض الحالات، كيقدر الإنسان يتعايش مع صعوبات فالتواصل اليومي أو يعتبرها أمور بسيطة، خصوصاً إلا كانت كتظهر تدريجياً مع الوقت.

ومن خلال حملة UNMUTE MOROCCO، كيدعو مركز «أوديتك» الناس باش ما يستهونوش بأي صعوبة كتتعلق بالسمع، ويلجؤوا للمختصين إلا لاحظو شي تغيير أو عرض كيستدعي الانتباه.

وكتشجع الحملة كذلك على التواصل مع أفراد العائلة فجوّ ديال التفهّم والدعم، حيث الحديث على مشاكل السمع والتعبير عليها يقدر يكون أول خطوة نحو الحصول على المساعدة المناسبة.

ومن خلال هاد المبادرة، كيواصل مركز «أوديتك» المساهمة فالتوعية بأهمية صحة السمع، وتشجيع الجمهور على طلب المشورة من المتخصصين فهاد المجال.

وبفضل تجربة كتفوق 20 عام، كيقدّم المركز حلول كتراعي الاحتياجات ديال المرضى ونمط الحياة ديال كل واحد، مع التركيز على الإصغاء والتفهّم ومواكبة الأشخاص اللي كيحتاجو الدعم فالمسار ديالهم نحو سمع أفضل.